رۆژی یەكشەممە 22-5-2022، لە دەستەی كوردستانی بۆ دراساتی ستراتیجی و توێژینەوەی زانستی، سیمینارێك بە ناونیشانی (پشكنینی پێشوەختە بۆ دیاریكردنی گرێ و شێرپەنجەی مەمك)، بۆ بەڕێز د.نەرمین ساڵح ئەحمەد هەڵگری بڕوانامەی دكتۆرا لە بواری شێرپەنجە، مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەچوو
 
لە سیمینارەكەدا، د.نەرمین ساڵح ئەحمەد، ئاماژەی بەوەدا: گرێ و شێرپەنجەی مەمك یەكێكە لە نەخۆشییە باوەكان لە نێو خانماندا، وتیشی: شێرپەنجەی مەمك یەكێكە لە شێرپەنجە زۆر باوەكان و هۆكاری مردنی هەزارەها خانمە لە جیهاندا، ئەم نەخۆشییە رەنگە لە پیاوانیشدا دەربكەوێت، بەڵام بە رێژەی كەم
 
هۆكارەكانی توشبوون
 
هەر لە سیمینارەكەدا، هۆكارەكانی توشبوون بە شێرپەنجەی مەمك خرانەڕوو، لەوبارەیەوە ئاماژە بەوە درا: كۆمەڵێك هۆكار دەبێتە هۆی توشبوونی گرێی مەمك و شێرپەنجە، وەكو تەمەن، شێوازی ژیان و بۆماوە و هۆرمۆنی ئیسترۆجین  و ژینگە و…هتد
 
رێگەكانی چارەسەر
 
لە بەشێكی دیكەی سیمینارەكەدا رێگەكانی چارەسەر روونكرانەوە و لەوبارەیەوە د.نەرمین ساڵح ئەحمەد رایگەیاند: زوو دەستنیشانكردن و دیاریكردنی جۆرە جیاوازەكانی گرێی مەمك، كاریگەریی زۆری دەبێت لەسەر چاكبوونەوە و درێژی تەمەنی نەخۆش، یەكەم هەنگاویش بە پشكنینی خودی كەسەكە  بۆ مەمكەكان دەستپێدەكات لەلایەن خانمانەوە مانگی جارێك لە تەمەنی سی ساڵی بەرەو سەرەوە، هەروەها سەردانی پزیشك و ئەنجامدانی مامۆگرام هەنگاوی دووەمە بە تایبەتی دوای تەمەنی چل ساڵی، ئاماژەی بەوەشدا: ئەو كەسانەی لە خێزانەكانیان ئەگەری ئەوەیان هەیە كە شێرپەنجەی مەمك و هێلكەدان زۆرباوە، دەبێت زۆر زووتر لە كەسانی دیكە، پشكنینی پێشوەختە بكەن
 
لە كۆتاییشدا لە نێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
 
سیمینارەكە  دووبارە پێشكەشكرایەوە
 
شایانی باسە، لە بەر گرنگیی بابەت و ناوەڕۆكی سیمینارەكە و لەسەر داواكاریی بەشێكی زۆر لە ئامادەبووان، ئەمڕۆ دووشەممە 23-5-2022، لە دەستەی كوردستانی بۆ دراساتی ستراتیجی و توێژینەوەی زانستی، بەڕێز د.نەرمین ساڵح ئەحمەد هەڵگری بڕوانامەی دكتۆرا لە بواری شێرپەنجە، مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، دووبارە سیمینارەكەی پێشكەشكردەوە