لە درێژەی ئەو زنجیرە سیمینارانەی كە لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەدەچن، ئەمڕۆ دووشەممە 23-1-2023، لە دەستەی كوردستانی، سیمینارێك بە ناونیشانی (توێژینەوە و پەرەپێدان لە كەلەپووری دیجیتاڵی)، بۆ بەڕێز د.ڕۆژین كەمال محەمەدئەمین مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەچوو
لە سیمینارەكەدا، بەڕێز د.ڕۆژین كەمال محەمەدئەمین، بە وردی و بە داتا و خستنەڕووی چەندین نموونە، تیشكی خستەسەر هۆكارەكانی گەشەسەندنی بواری كەلەپووری دیجیتاڵی و كاریگەرییە فرەلایەنەكانی ئەم بوارە نێوپسپۆڕییە، بۆ ئەو مەبەستەش چەندین نموونەی لە ئاستی جیهان و هەرێمی كوردستاندا خستەڕوو، لە پڕۆژە توێژینەوە فەندكراوەكانی خۆی و تیمەكەی لە تۆڕی نەهرەین، لە نێوانیاندا هەردوو پڕۆژەی (سەرا بدوێنە) و (سەرای مەجازی) بۆ گێڕانەوەی كاریگەرانەی مێژووی بینای سەرای سلێمانی لەسەر زاری شایەتحاڵەكان لە كەسایەتییە مێژووییەكان، هەروەها پڕۆژەی (وەك من هەست بكە) كە پڕۆژەیەكی كەلەپووری دیجیتاڵییە بۆ خستنەڕووی ئازار و ئەو قسە رەقانەی كە هەندێكجار رووبەڕووی كۆمەڵگەی ئێزدی، دەبێتەوە
لە بەشێكی دیكەی سیمینارەكەدا، لایەنە ئەرێنییەكانی توێژینەوە و پەرەپێدان لە كەلەپووری دیجیتاڵیدا روونكرایەوە، هەروەها تیشكخرایەسەر ئاستەنگەكانی بەردەم توێژینەوە و پەرەپێدانی پڕۆژەی كەلەپووری دیجیتاڵی
لە بەشی كۆتایی سیمینارەكەدا، ئامادەبووان بە شێوەی پراكتیكی ژمارەیەك پڕۆژە و توێژینەوەی نێو پسپۆڕی پێشكەشكار و تیمە توێژینەوەكەیان، تاقیكردەوە
دوای پێشكەشكردنی سیمینارەكە، لەنێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
كورتەیەك لەبارەی د.ڕۆژین كەمال محەمەدئەمین
د.ڕۆژین كەمال محەمەدئەمین، هەڵگری بڕوانامەی بەكالۆریۆسە لە ئەندازیاری تەلارسازی (زانكۆی سلێمانی)، بڕوانامەی ماستەر و دكتۆرا لە دیزاینی ژینگە و كۆمپیوتەیشنەڵ میدیا دیزاین لە زانكۆی كالگەری لە كەنەدا
جگە لە كاركردنی وەكو توێژەر و مامۆستا لە دەستەی كوردستانی، د.ڕۆژین هاوبەڕێوەبەری تۆڕی نەهرەینە كە بنكەكەی لە زانكۆی یو سی ئێڵی بەریتانییە و توێژەری فەخریشە لە هەمان زانكۆ
هەروەها جێگری سەرۆكی رێكخراوی نێودەوڵەتیی رەشیدیشە بۆ پاراستنی كەلەپووری كەلتووری لە عیراق، كە رێكخراوێكی راوێژكارییە بۆ نەتەوە یەكگرتووەكان و بنكەكەی لە ئەڵمانیایە
لە هەمان كاتدا، د.ڕۆژین هەڵسەنگێنەری نێودەوڵەتیی پڕۆژەی توێژینەوە و فەندەكانی دەزگای توێژینەوە و داهێنانی حكومەتی بەریتانییە و خاوەنی چالاكی پیشەیی و ئەكادیمییە لە 22 وڵات لە باكووری ئەمریكا، ئەوروپا، ئاسیا، ئوسترالیا و رۆژهەڵاتی ناوەڕاست
هەڵگری ژمارەیەكی بەرچاو لە خەڵاتی ئەكادیمی و سكۆلارشیپ و فیلۆشیپ و سوپاس و پێزانینی نێودەوڵەتی و ناوخۆییە و داڕێژەری بیرۆكە و نووسەری پرۆپۆزەڵ و بەڕێوەبەر و هاوبەڕێوەبەری ژمارەیەك پڕۆژەی ئەكادیمییە كە گرانتی نێودەوڵەتی لە بەریتانیا و ئەمریكا و یەكێتیی ئەوروپاوە وەرگرتووە
