لە درێژەی ئەو زنجیرە سیمینارانەی كە لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەدەچن، ئەمڕۆ سێشەممە 7-3-2023 ، لە دەستەی كوردستانی، سیمینارێك بە ناونیشانی (زمان وەك قەڵغان، رۆڵی زمان لە پاراستنی ناسنامەی نەتەوەییدا، پەند و نموونەكانی مێژووی كۆن)، بۆ بەڕێز پ.ی.د.كۆزاد محەمەد ئەحمەد مامۆستا لە زانكۆی سلێمانی، بەڕێوەچوو
لە سیمینارەكەدا، پ.ی.د.كۆزاد محەمەد ئەحمەد، ئەوەی خستەڕوو: زمانى هەر نەتەوەيەك وەك قەڵغانێكە كە پارێزەر و هەڵگر و درێژەپێدەرى ناسنامە و فەرهەنگ و يادەوەرييەكەيەتى، وتیشی: بۆ پاراستنی بوونى هەر نەتەوەيەك، زمانەكەى دەبێت بپارێزرێت و ئەمەش بە پلەى يەكەم كارى دەسەڵاتى سياسيى وڵاتە و پێویستە سياسەتێكى زمانەوانيى هەبێت بۆ پاراستن و پەرەپێدانى زمان
هەر لە سیمینارەکەدا، ئاماژە بەوەدرا: لەناوچوونى زمان، واتاى نەمانى ئەو قەڵغانەيە و بەدەر لەوەى بەشێكى گرنگ و گەورەى فەرهەنگ و يادەوەريى مرۆڤايەتى لەناو دەچێت، دەبێتە هۆى ئەوەى ئەو نەتەوە بێ زمانەش لەگەڵ نەتەوەيەكى لەخۆى گەورەتر، يان بەدەسەڵات تردا، ئاوێتە ببێت، نموونەى ئەمەش لە مێژووى كۆندا زۆر روويان داوە و ئێستاش لەسەرخۆ روودەدات، راشیگەیاند: ئێمەش بۆ پارێزگارى لە بوونى خۆمان، دەبێت سياسەتێكى زمانەوانيى روون و رێكخراومان هەبێت
دوای پێشكەشكردنی سیمینارەكە، لەنێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
بۆ زانیاریی زیاتر كلیك لەسەر ئەم لینكەی خوارەوە بکە7
