لە درێژەی ئەو زنجیرە سیمینارانەی كە لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەدەچن، ئەمڕۆ چوارشەممە 31-5-2023، لە دەستەی كوردستانی، سیمینارێك بەناونیشانی (خوێندنەوە و رانانێك بۆ رۆمانی زینە، لە نووسینی د.نەوال ئەلسەعداوی، وەرگێڕانی: تریفە محەمەد ئەحمەد)، بۆ بەڕێز مامۆستای یاریدەدەر تریفە محەمەد ئەحمەد مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەچوو
لە سیمینارەكەدا، مامۆستای یاریدەدەر تریفە محەمەد ئەحمەد، ئاماژەی بەوەدا: رۆمانی زینە بە تەکنیکی نوێ و سەردەمیانە، بە شێوازی تازەی رۆماننووسین و بە پێودانگی خوێندنەوەو هەڵسەنگاندنی میتۆدەکانی رەخنە، لە فۆرمێکی هەرە پێشکەوتووی نووسیندایە، تێیدا نووسەر هێڵە سوورەکانی تێپەڕاندووە و روخساری پشت ماسکەکانی ئاشکراکردووە، وتیشی: د.نەوال ئەلسەعداوی هەروەک چۆن وەکو نووسەرێکی رچەشکێن ناسراوە، ئەم رۆمانەشی کە دوا رۆمانێتی، بەهەمان ریتم و شێواز و بێ پەروا ویستوویەتی حەقیقەتی زانستی و راستییەکان وەکو خۆی بگەیەنێ
لە بەشێكی دیكەی سیمینارەكەدا، پێشکەشکاری سیمینار ئەوەی خستەڕوو: د.نەوال ئەلسەعداوی، بە دیدێکی واقیعبینانە و بابەتیانە درکی بە مەترسییەکانی چەواشەکاریی سیستمی بەڕێوەبردن کردووەو ویستوویەتی ئەم رۆمانە وەکو پەیامێکی مرۆیی بگەیەنێتە کۆمەڵگەی رۆژهەڵاتیی
دوای پێشكەشكردنی سیمینارەكە، لەنێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
شایانی باسە، رۆمانی زینە، نووسینی د.نەوال ئەلسەعداوی، لەلایەن مامۆستای یاریدەدەر تریفە محەمەد ئەحمەد مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، وەرگێڕدراوەتە سەر زمانی كوردی و ئێستا لە دەزگای جەمال عیرفان بەردەستە
بۆ زانیاریی زیاتر کلیک لەسەر ئەم لینکانەی خوارەوە بکە