رۆژی چوارشەممە 20-12-2023، لە باخی توێژینەوەی خۆراک و کەلەپوور لە دەستەی كوردستانی بۆ دراساتی ستراتیجی و توێژینەوەی زانستی، چالاکییەک بەناونیشانی (سەربەخۆیی تۆو و خۆراک) بەڕێوەچوو.
لە چالاکییەکەدا کە بە ئامادەبوونی پرۆفیسۆری یاریدەدەر د.فەرەیدون نەجم رەشید بەڕێوەبەری گشتی لە دەستەی كوردستانی، ژمارەیەکی بەرچاو لە شارەزایانی بواری کشتوکاڵ و میوان و مامۆستایان و توێژەران و ستافی ئەکادیمی و کارمەندانی دەستەی کوردستانی، بەڕێوەچوو، چەندین چالاکی لە بواری کشتوکاڵیی سروشتی و گرنگیی سەربەخۆیی تۆو و خۆراک پێشکەشکران و گرنگیی بایەخدان بە کشتوکاڵیی سروشتی و بەرهەمی خۆماڵی روونکرانەوە.
چالاکییەکە بەشێکە لە توێژینەوەی مێژووی زارەکی رێکخراوی رۆزە لۆکزومبێرگی ئەڵمانی، کە لەلایەن د.شنە شەریف-ەوە، وەک بەڕێوەبەری سەربەخۆی خۆراکی ئەو رێکخراوە لە عیراق بەڕێوەدەچێت.
ئامانجی چالاکییەکە
ئامانجی چالاکییەکە بریتی بوو لە: خستنەڕووی گرنگیی کتێبخانەی تۆو کە تەنها تۆوی خۆماڵی جوتیاران لەخۆدەگرێت، تۆو لەم کتێبخانەیە نافرۆشرێت، بەڵکو ئاڵوگۆڕدەکرێت لەنێوان جوتیاراندا، گرنگیدان بە کشتوکاڵی سروشتی بەپشتبەستن بە تۆوی خۆماڵی و پەیینی سروشتی بەبێ بەکارهێنانی پەیینی دەستکرد و قڕکەرەکانی نەخۆشی و مێروو ، بژار، ئەمەش لەپێناوی دەستکەوتنی خۆراکی سەربەخۆ و تەندروست، بڵاوکردنەوەی هۆشیاری لەبارەی مەترسیی خۆراکی دەستکەوتوو لە کشتوکاڵی پیشەسازیی لەسەر مرۆڤ و خاک و ئاو و هەوا، گرنگیدان بە جوتیارە رەسەنەکانی کوردستان بە سەردانکردنیان و تۆمار و پێدانی زانیاری پێیان، باسکردنی رۆڵی سەنتەرەکانی توێژینەوە و میدیاکان لە پاڵپشتی ئەم جۆرە پڕۆژانە کە سوودی بۆ کوردستان و کۆمەڵگەی کوردی هەیە.
ستافی پڕۆژەکە
ستافی پڕۆژەی باخی توێژینەوەی خۆراک و کەلەپوور لە دەستەی كوردستانی بۆ دراساتی ستراتیجی و توێژینەوەی زانستی، پێکهاتوون لە:
سەرپەرشتیارانی پڕۆژە: د.شنە شەریف عەبدوڵڵا مامۆستا و توێژەر لە دەستەی كوردستانی، رێباز عومەر محەمەد یاریدەدەری ئەندازیاری کشتوکاڵ لە دەستەی كوردستانی.
بەڕێوەبەری پڕۆژە: پرۆفیسۆری یاریدەدەر د.فەرەیدون نەجم رەشید بەڕێوەبەری گشتی لە دەستەی كوردستانی.
جێبەجێکارانی پڕۆژە: بەختیار عەلی هەمزە یاریدەدەری جیۆلۆجی لە دەستەی كوردستانی، هێمن عوسمان محەمەد جیۆلۆجی لە دەستەی كوردستانی.
شایانی باسه، رۆژی 3-5-2023، له ده‌سته‌ى کوردستانى بۆ دراساتى ستراتیجى و توێژینه‌وه‌ى زانستی، له رێوڕه‌سمێکدا، رۆژى کراوه‌ى باخى (بوژاندنه‌وه‌ى کشتوکاڵى سروشتی)، به‌ڕێوه‌چوو.
بۆ خوێندنه‌وه‌ی زانیاریى زیاتر له‌وباره‌یه‌وه، کلیک له‌سه‌ر ئه‌م لینکه‌ى خواره‌وه بکه
