ئەمڕۆ دووشەممە 22-4-2024، دەستەی كوردستانی بۆ دراساتی ستراتیجی و توێژینەوەی زانستی، بەهاوبەشی لەگەڵ رێكخراوی رۆزە لۆكسمبۆرگ، فێستیڤاڵێكیان بەناونیشانی (خۆژێنی، سەربەخۆییە!) رێكخست و ماوەی دوو رۆژ دەخایەنێت.
ئەمڕۆ لە یەكەم رۆژی فێستیڤاڵەكەدا، كە لە پاركی ئازادی لە سلێمانی بەڕێوەچوو، ئەم چالاكییانە پێشكەشكران، وۆركشۆپی توێژینەوەی قڕكەرەكان، ناساندنی كتێبـی گرافیكی كشتوكاڵ لە كوردستان و عیراق، پیشانگەی مێژووی زارەكی جووتیار لە گوندەكانی سنوری پارێزگای سلێمانی، پیشانگەی توێژینەوەی ژینگەیی، پیشانگەی تۆوی خۆماڵی جووتیارەكان، پیشانگەی خۆراك و كەلەپوور لە دەستەی كوردستانی، چالاكی ئەكادیمییەكان و خوێندكارانی زانكۆی سلێمانی، نمایشی دوو فیلم لە بارەی كشتوكاڵی سروشتی، مێزگرد و شرۆڤە لە بارەی پرسی خۆژێنی.
بڕیاریشە، سبەینێ سێشەممە 23-4-2024، لە گوندی دێرێی خواروو لە ناوچەی شارباژێڕ، لە دووەم رۆژی فێستیڤاڵەكەدا، ئەم چالاكییانە پێشكەشبكرێن، (نمایشی كورتەفیلمی توێژینەوەی مێژووی زارەكی، مێزگرد و شرۆڤەی جووتیارانی ناوچەكە، تامكردنی خواردنە خۆماڵییەكانی دێرێ، بازاڕی بەرهەمی خۆماڵی جووتیاران لە دێرێ، سەردانی مەیدانی بۆ دوو كێڵگە لە گوندەكە).
کارەکانی دووەم رۆژ لە سەعات 10:30 دەقیقەی سەرلەبەیانییەوە دەستپێدەكات.
بۆ زانیاریی زیاتر لەبارەی بەرنامەی فێستیڤاڵەكەوە، كلیك لەسەر ئەم لینكەی خوارەوە بكە