لە درێژەی ئەو زنجیرە سیمینارانەی كە لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەدەچن، رۆژی چوارشەممە 26-10-2022، لە دەستەی كوردستانی بۆ دراساتی ستراتیجی و توێژینەوەی زانستی، سیمینارێك بە ناونیشانی (كشتوكاڵی ئیكۆلۆژی و سەروەریی خۆراك: بەرپرسیارێتی و پێداویستی)، بۆ بەڕێز د.شنە شەریف عەبدوڵڵا مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەچوو
لە سیمینارەكەدا، د.شنە شەریف عەبدوڵڵا، زانیاریی پێویستی لەبارەی كشتوكاڵی ئیكۆلۆژی، خستەڕوو، رایگەیاند: كشتوكاڵی ئیكۆلۆژی پشت بە رێگەی زانستی و كەلەپووری و زانیاری ناوچە دێرینەكان بەتایبەتی ئەزموونی ژنان و جووتیارە رەسەنەكان دەبەستێت لەپێناوی پاراستنی بەپیتی خاك، هاوسەنگیی زیندەوەرەكان و دابینكردنی خۆراكی تەندروست
هەر لە سیمینارەكەدا، د.شنە شەریف عەبدوڵڵا، پێناسە و گرنگی سەروەریی خۆراك و بەرپرسیارێتی توێژەرانی لەوبارەیەوە روونكردەوە و ئاماژەی بەوەشدا: هەموومان بەرپرسیارین لە بەرامبەر پرسی سەروەریی خۆراكدا و پێویستە هەمومان پێكەوە كاربكەین بۆ ئەوەی هۆشیاریی پێویست لەبارەی سەرەوەریی خۆراكەوە، بڵاوبكەینەوە، چونكە پاراستنی سەروەریی خۆراك ئەركی هەموومانە
هەروەها بە چەند خاڵێک باسی لە مەترسییە تەندروستییەکانی مێرووکوژ و قڕکەرەکان بەگشتی و بەتایبەت لەسەر منداڵان کرد
لە بەشێكی دیكەی سیمینارەكەدا، بەڕێز د.عەلی تالیب مامۆستا و توێژەر لە دەستەی كوردستانی بۆ دراساتی ستراتیجی و توێژینەوەی زانستی، لەمیانی بەشداریكردن لە گفتوگۆكان لەسەر ناوەڕۆكی سیمینارەكە، بەپشت بەستن بە چەندین توێژینەوە و سەرچاوەی زانستی و تەندروستی، تیشكی خستەسەر پێویستی پاراستنی سەروەریی خۆراك و هەوڵدان بۆ دابینكردن و بەكارهێنانی خۆراكی تەندروست و دووركەوتنەوە لەو مادانەی كە زیان بە تەندروستیی مرۆڤ دەگەیەنن
دوای پێشكەشكردنی سیمینارەكە، لە نێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
