لە درێژەی ئەو زنجیرە سیمینارانەی كە لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەدەچن، ئەمڕۆ چوارشەممە 2-11-2022، لە دەستەی كوردستانی بۆ دراساتی ستراتیجی و توێژینەوەی زانستی، سیمینارێك بە ناونیشانی (كاریگەریی فرەجۆری چینە بەردەكان لەسەر جووڵەی شلەكان لە پێكهاتووی سەرگەڵوو)، بۆ بەڕێز پرۆفیسۆری یاریدەدەر د.فەرەیدون نەجم رەشید بەڕێوەبەری گشتی لە دەستەی كوردستانی بۆ دراساتی ستراتیجی و توێژینەوەی زانستی، بەڕێوەچوو
لە سیمینارەكەدا، پرۆفیسۆری یاریدەدەر د.فەرەیدون نەجم رەشید، هەڵسەنگاندنی بۆ كاریگەرییەكانی گۆڕانی چینە بەردییەكانی پێكهاتووی سەرگەڵوو كرد لەسەر توانای گلدانەوە و جووڵەی هایدرۆكاربۆن لە بیرە نەوتەكانی كێڵگەی ئەتروش لە هەرێمی كوردستان
هەر لە سیمینارەكەدا، د.فەرەیدون نەجم رەشید، كە توێژەرە لە بواری كۆگەكانی هایدرۆكاربۆن لە كێڵگەكانی نەوت و گازی عیراق و هەرێمی كوردستان، بە پشتبەستن بە زانیاریی وەرگیراو لەو بیرانەی كە ئێستا بەرهەمهێنانی نەوت تێیاندا بەردەوامە و لەگەڵ داتای پێوانەكراو لە تاقیگەكانی نەوتدا، كاریگەرییەكانی بەرهەمهێنانی نەوت لەسەر رێڕەوی جووڵەی نەوت لە پێكهاتووی سەرگەڵو روونكردەوە و دەرئەنجامە پێشبینیكراوەكانی بۆ رێژەی بەرهەمهێنانی نەوت خستەڕوو، ئاماژەی بەوەشدا: پێكهاتووی سەرگەڵوو وەك بەردی دروستكەر و بەرهەمهێنەری هایدرۆكاربۆن ناسێندراوە لەلایەن ژمارەیەكی زۆر توێژەری ناوخۆیی و جیهانی، هەروەها ژمارەیەكی بەرچاو لە توێژینەوەی بڵاوكراوە هەیە، بەڵام لەم توێژینەوەیەدا ئەوە سەلمێندراوە كە پێكهاتووی سەرگەڵوو لە كێڵگەی ئەتروش رۆڵی کۆگەی نەوتی هەیە و رۆژانە بەرهەمی نەوتی خاوی هەیە
دوای پێشكەشكردنی سیمینارەكە، لە نێوان پێشكەشكار و ئامادەبووانی سیمینارەكەدا، گفتوگۆی زیاتر لەبارەی ناوەڕۆكی سیمینارەكەوە كرا و وەڵامی پێویستی پرسیاری ئامادەبووان درایەوە
