وەزارەتى خوێندنى باڵا و توێژینەوەى زانستى، گرنگترین رێکارەکانى تاقیکردنەوەى توانستى زانستى لە زانکۆکانى هەرێمى کوردستان بڵاودەکاتەوەو رایدەگەیەنێت، لەپێناوی بەرژەوەندیى گشتیى خوازیاران و بەدیهێنانى شەفافییەت و دادپەروەرى و هەلى یەکسان لە پڕۆسەى ئەنجامدانى تاقیکردنەوەى توانستى زانستى کە رۆژى دووشەممە 2023-6-12 سەعات 11ى بەیانى بەڕێوەدەچێت، رەچاوى ئەم خاڵانەى خوارەوە بکرێت
١- پێویستە پەڕاوى تاقیکردنەوەى توانستى زانستى لە نێو کۆلێژدا هەڵەچنین (تصحیح) بکرێت و بە هیچ شێوەیەک نابێت ببرێتە دەرەوەى زانکۆ
٢- پێویستە پەڕاوى تاقیکردنەوەى توانستى زانستى لە هەر بەشێک یان کۆلێژێک، لە هۆڵێکی ئامادەکراو هەڵەچنینی بۆ بکرێت
٣- ماوەى ئەنجامدانى تاقیکردنەوەى توانستى زانستى بۆ خوێندنى باڵا-دبلۆمى باڵاى یەک ساڵەى ئەکادیمی، سێ سەعات دەبێت، هەروەها بۆ خوێندنى باڵا-دبلۆمى باڵاى دوو ساڵەى پزیشکى و ماستەر و دکتۆرا ماوەکە چوار سەعات دەبێت
٤- وەڵامدانەوەى پرسیارى تاقیکردنەوە تەنها بە قەڵەم جافى رەنگى شین دەبێت، لەپێناوی نەبوونى جیاوازى لە پەڕاوى تاقیکردنەوەى پێشکەشکاران، پێویستە لەلایەن زانکۆکانەوە قەڵەم جافى رەنگى شین بۆ پێشکەشکاران دەستەبەر بکرێت
٥- رێگە بە بردنە ژوورەوەى ئامێرەکانى پەیوەندیکردن و تەکنەلۆژیا بۆ نێو هۆڵى تاقیکردنەوە نادرێت وەکو مۆبایل و سەعاتى زیرەک و ..هتد
٦- پێویستە هەر پرسیارێک لەسەر پەڕاوێکى جیاواز وەڵام بدرێتەوە
٧- پێویستە پەڕاوى تاقیکردنەوەکان ئامادە بێت بۆ ئەوەى لە هەر کاتێکى پێویست لیژنەى تایبەت لە وەزارەتى خوێندنى باڵا و توێژینەوەى زانستى سەردانى بەش و کۆلێژەکان لە زانکۆ بکات بەمەبەستى وردبینی و دڵنیابوون لە جێبەجێکردنى گشت رێنماییەکانى پەیوەندیدار
٨- پێویستە بەشداربوو تەنها وەڵامى پرسیارەکان لە پەڕاوى تاقیکردنەوە بنووسێت و نابێت هیچ ئاماژەو هێمایەک…هتد تێدا بنووسێت، بە پێچەوانەوە بە گزى (غش) هەژمار دەکرێت و بە پێى رێنماییەکاتى تاقیکردنەوەکان مامەڵەى لەگەڵ دەکرێت
٩- پێویستە بەشداربوو پابەندبێت بە رێکارەکانى لیژنەى سەرپەرشتى تاقیکردنەوەکان و چاودێرەکانى هۆڵى تاقیکردنەوە، بەپێچەوانەوە بەپێى رێنماییەکانى تاقیکردنەوەکان مامەڵەى لەگەڵ دەکرێت
١٠- پێویستە بەشداربوو یەکێک لە بەڵگەنامە رەسەنەکانى وەکو ناسنامەى بارى شارستانى، رەگەزنامە، کارتى نیشتمانى، پاسپۆرت-ى پێبێت
